Próf í verðbréfaviðskiptum 2011-2012
Prófnefnd verðbréfaviðskipta stendur fyrir prófum í verðbréfaviðskiptum veturinn 2011-2012 sem hér segir:
- Próf í I. hluta verða haldin 29. október, 2. og 5. nóvember 2011
- Próf í II. hluta verða haldin 21., 25. og 28. janúar 2012
- Próf í III. hluta verða haldin 25., 28. apríl, 2. og 5. maí 2012
Um prófin fer samkvæmt reglugerð nr. 633/2003 um próf í verðbréfaviðskiptum, með áorðnum breytingum. Vakin er athygli á að próf í verðbréfaviðskiptum verða ekki haldin nema að a.m.k. 10 manns hafi skráð sig í próf, sbr. 2. gr. reglugerðar nr. 633/2003 um próf í verðbréfaviðskiptum. Sama á við um haustpróf 2012. Öllum er heimilt að skrá sig til verðbréfaviðskiptaprófs.
Prófnefnd verðbréfaviðskipta tekur ákvörðun um efni sem prófað er úr á verðbréfaviðskiptaprófi og semur prófsefnislýsingu, sbr. 3. gr. reglugerðar nr. 633/2003. Í prófsefnislýsingu greinir jafnframt upplýsingar um leyfileg hjálpargögn í prófum o.fl., en lýsinguna má nálgast á vefsíðu efnahags- og viðskiptaráðuneytis, www.efnahagsraduneyti.is (Prófnefndir > Prófnefnd verðbréfaviðskipta). Lengd hvers prófs er allt að 4 klukkustundir. Um undanþágur frá töku prófa fer skv. 4. gr. reglugerðar nr. 633/2003. Einkunnir í einstökum prófum eru gefnar í heilum og hálfum tölum frá 0 til 10. Til þess að standast verðbréfaviðskiptapróf þarf próftaki að hljóta a.m.k. 7,0 í meðaleinkunn úr þeim prófum sem hann hefur þreytt og skal próftaki hafa lokið öllum nauðsynlegum prófum með fullnægjandi árangri innan þriggja ára frá því að hann tók fyrsta prófið. Próftaki telst ekki hafa staðist einstök próf hljóti hann lægri einkunn en 5,0. Nánari upplýsingar um verðbréfaviðskiptapróf má nálgast á fyrrgreindri vefsíðu prófnefndar.
Próftökum verður tilkynnt um nákvæmari tíma- og staðsetningu er nær dregur prófunum, sem þreytt verða í húsakynnum á vegum Opna háskólans í Háskólanum í Reykjavík.
Skráning í prófin fer fram á vefsíðu Opna háskólans http://www.opnihaskolinn.is/. Próftakar verða að hafa skráð sig og greitt prófgjald minnst einni viku fyrir sérhvert próf.
Prófgjald verður auglýst síðar á heimasíðu prófnefndar á vefsíðu efnahags- og viðskiptaráðuneytisins http://www.efnahagsraduneyti.is/profnefndir/nr/2844.
Reykjavík,3. september 2011
Prófnefnd verðbréfaviðskipta