Mál nr. 1/2003 - Frávísun

Kærunefnd hefur móttekið erindi yðar og tekið það til umfjöllunar. Lögbundið hlutverk kærunefndar lausafjár- og þjónustukaupa er að fjalla um ágreining um réttindi og skyldur samkvæmt lögum nr. 50/2000 um lausafjárkaup og lögum nr. 42/2000 um þjónustukaup.

Við meðferð málsins fyrir nefndinni hefur komið í ljós að söluhlut þeim sem gaf sig (framhjólalega í bifreið), og varð þannig upphaf að kæru yðar, var ekki haldið til haga og er því ekki lengur fyrir hendi. Þar sem bifreiðin var mikið ekin m.v. aldur hefði verið nauðsynlegt að skoða söluhlut þann sem kvartað er yfir. Þegar framhjólalegan gaf sig hafði bifreiðinni verið ekið 127.500 km sem jafna má til 6- 8 ára meðalaksturs. Þetta leiðir til þess að ekki verður úr því skorið hvort hlutur þessi var haldinn galla eða hvort um eðlilegt slit var að ræða. Af þeirri ástæðu getur kærunefndin ekki tekið efnislega afstöðu í málinu.

Varðandi beiðni yðar um að tekin verði afstaða til þess hvort tveggja ára ábyrgð söluhlutar gildi óháð notkun vill kærunefndin taka eftirfarandi fram: Kærunefndin fjallar ekki um almenn álitaefni sem snerta ekki tiltekinn réttarágreining. Þar sem þegar hefur komið fram að ekki verður úr því skorið hvort söluhlutur sá, sem upphaflega varð tilefni kærunnar, var haldinn galla er það mat nefndarinnar að ekki sé rétt að gefa álit um þetta tiltekna atriði. Slíkt álit væri umfjöllun um almennt álitaefni sem ekki snerti tiltekinn réttarágreining.

Með vísan til ofangreinds er máli þessu vísað frá kærunefndinni.