Mál nr. 10/2005 - Frávísun

Vísað er til erindis yðar dags. 30. desember s.l., þar sem óskað er eftir álitsgerð kærunefndar lausafjár- og þjónustukaupa í ágreiningi yðar við Y vegna samsetningar einingahúss að .......... Kærunefndin hefur fjallað um erindið og er samdóma álit nefndarmanna að mál yðar sé ekki tækt til efnislegrar meðferðar og álitsgjafar af hálfu nefndarinnar. Í máli yðar reynir með margþættum hætti á efndir samnings um samsetningu einingahúss og að mati nefndarinnar er ókleift að leysa úr málinu með forsvaranlegum hætti á vettvangi nefndarinnar. Ástæðan er sú að samkvæmt 1. mgr. 9. gr. reglugerðar nr. 565/2001 er málflutningur fyrir nefndinni skriflegur og nefndin kallar hvorki fyrir vitni né matsmenn. Eðli málsins samkvæmt getur nefndin því ekki gefið út matskenndar álitsgerðir sem krefjast sérkunnáttu eða vettvangsrannsóknar með þeim hætti sem nauðsynlegar eru til úrlausnar máls yðar. Úr hvoru tveggja er hins vegar unnt að leysa fyrir héraðsdómi, með öflun matsgerðar eða með öðrum hætti.

Tilgangur löggjafans með skipan kærunefndar var að leggja aðilum í lausafjár- og þjónustukaupum til ódýra og skjótvirka leið til þess að fá álitsgerð um réttarágreining á gildissviði laganna. Málsmeðferðarreglur nefndarinnar setja henni hins vegar takmörk og að mati nefndarinnar er óhjákvæmilegt annað en að vísa kröfum yðar frá nefndinni.