Mál 3/2002 - Frávísun

Varðar mál nr. 3/2002 hjá Kærunefnd lausafjár- og þjónustukaupa.

Vísað er til erindis yðar til Kærunefndar lausafjár- og þjónustukaupa, dags. 14. október sl., sem móttekið var af kærunefndinni þann 15. október sl. Í erindinu er óskað eftir áliti kærunefndarinnar vegna ágreinings yðar við fyrirtækið X um greiðslu á kostnaði við flutning sjónvarpstækis til viðgerðar.

Með bréfi dagsettu 18. nóvember sl. sendi kærunefndin erindi yðar til X til umsagnar. Umsögn X barst með bréfi dagsettu 8. desember sl. og var hún tekin til umfjöllunar nefndarinnar á fundi hennar 30. desember. Af henni má, að mati nefndarinnar, ráða, að fyrirtækið hafi sótt sjónvarpið til yðar á sinn kostnað og að viðgerð á tækinu sé lokið.

Samkvæmt 3. mgr. ákvæðis til bráðabirgða með lögum nr. 50/2000 um lausafjárkaup hefur kærunefndin það hlutverk að veita álit um ágreining aðila að lausafjár- og þjónustukaupum. Í álitsbeiðni þarf að koma fram með skýrum hætti hvert ágreiningsefni er, hver er krafa aðila og rökstuðningur fyrir henni. Kærunefndin fjallar ekki um almenn álitaefni sem snerta ekki tiltekinn réttarágreining. Ekki verður, að mati nefndarinnar, ráðið af gögnum málsins að ágreiningur sé milli yðar og X um greiðslu flutningskostnaðar.

Með vísan til ofangreinds er málinu vísað frá kærunefndinni.