Nefnd til að endurskoða brunatryggingar fasteigna
Viðskiptaráðherra hefur skipað nefnd sem á að fara heildstætt yfir kosti og galla þess að afnema skylduvátryggingu vegna bruna húseigna.
Í nefndinni eru:
- Þóra Margrét Hjaltested, lögfræðingur í viðskiptaráðuneytinu, formaður,
- Guðrún Áslaug Jósepsdóttir, tilnefnd af Fjármálaeftirlitinu,
- Sandra Baldvinsdóttir, héraðsdómari, tilnefnd af Húseigendafélaginu,
- Helga Jónsdóttir, lögfræðingur, tilnefnd af Samtökum fjármálafyrirtækja.
Skyldubrunatryggingar eru ekki lögfestar í nágrannalöndum okkar og er það verkefni nefndarinnar að kanna hvort sömu sjónarmið eða hagsmunir eiga við hér á landi. Afnám vátryggingarskyldunnar þarf hins vegar ekki að þýða það að brunatryggingar fasteigna leggist af. Meginbreyting sem afnám skylduvátrygginga hefði í för með sér er að vátryggingartaki og vátryggjandi semja um vátryggingarfjárhæð. Þar með fellur þörf fyrir samræmt opinbert brunabótamat niður og fasteignareigendur öðlast ríkari rétt til að ákvarða sjálfir hvaða þjónustu vátryggingafélaga þeir kaupa. Er nefndinni ætlað að kanna sérstaklega hagsmuni þeirra sem hafa hag af því að fasteignir séu brunatryggðar, t.d. veðhafar í fasteignum.
Nefndin skal skila viðskiptaráðherra skýrslu og eftir atvikum drögum að lagafrumvarpi fyrir 15. september 2008.
