Nefnd til að vinna að innleiðingu tilskipunar um stofnun og starfsrækslu vátryggingarfélaga í frumtrygginga- og endurtryggingastarfsemi - Solvency II tilskipun
Efnahags- og viðskiptaráðherra hefur skipað í nefnd til að vinna að innleiðingu tilskipunar um stofnun og starfrækslu vátryggingafélaga í frumtrygginga- og endurtryggingastarfsemi, svokallaðrar Solvency II tilskipunar, sem samþykkt var á Evrópuþinginu 22. apríl 2009.
Tilskipunin felur í sér víðtækar breytingar á starfsumhverfi vátryggingafélaga, einkum hvað varðar kröfur til fjárhagslegs styrks, áhættustýringar og upplýsingagjafar. Tilskipunin mun einnig fela í sér verulegar breytingar á starfsháttum eftirlitsstjórnvalda á vátryggingamarkaði Evrópska efnahagssvæðisins.
Í starfi sínu er nefndinni ætlað að leggja fram tillögur um hvernig staðið skuli að innleiðingu tilskipunarinnar. Einnig er henni ætlað að fylgjast með nánari útfærslum einstakra tilskipunarákvæða og gera tillögur að útfærslu þeirra hér á landi í lögum, reglugerðum eða reglum Fjármálaeftirlitsins. Til þess að tryggja að unnt verði að standa við innleiðingarfrestinn, en honum lýkur 31. október 2012, er gert ráð fyrir að nefndin ljúki störfum eigi síðar en 31. október 2011.
Í nefndinni eru:
- Sigurður Freyr Jónatansson, tryggingastærðfræðingur hjá Fjármálaeftirlitinu, formaður, samkvæmt tilnefningu FME
- Steinunn Guðjónsdóttir, tryggingastærðfræðingur, samkvæmt tilnefningu FÍT
- Ragnar Þ. Ragnarsson, tryggingastærðfræðingur, samkvæmt tilnefningu SFF
- Ólafur Lúther Einarsson, héraðsdómslögmaður, samkvæmt tilnefningu SFF
Vegna umfangs verkefnisins má ætla að nefndin muni þurfa að skipta með sér verkum og að varamenn muni því þurfa að taka virkari þátt í starfinu en almennt gerist. Eftirtaldir eru skipaðir varamenn:
- Inga Birna Einarsdóttir, viðskiptafræðingur, tilnefnd af FME
- Helgi Þórsson, tryggingastærðfræðingur, tilnefndur af FÍT
- Bjarni Guðmundsson, tryggingastærðfræðingur, tilnefndur af SFF
Fulltrúi efnahags- og viðskiptaráðuneytisins mun koma að nefndarstarfinu á síðari stigum.
